ഇരുമ്പ് സ്ത്രീ

Illastration:Abhilash N

നീ ജനിച്ച് ഒരു വര്‍ഷം തികയുമ്പോള്‍ - 

നിനക്കു വേണ്ടി, നിന്നെ ജീവിപ്പിക്കാന്‍ വേണ്ടി, 

നീ അനാഥനാവാതിരിക്കാന്‍ വേണ്ടി, 

നിന്റെ മാതാവ് വിധവയാകാതിരിയ്ക്കാന്‍ വേണ്ടി, 

നിന്റെ വംശം വേരറ്റു പോവാതിരിക്കാന്‍ വേണ്ടി, 

പട്ടിണി കിടക്കാന്‍ തുടങ്ങിയതാണ്‌ - അവര്‍ 

പട്ടിണിയിലൂടെ ഒരു മഹാരാജ്യത്തിന്മേലുള്ള - 

പാരതന്ത്ര്യത്തിന്റെ,ഭരണകൂട ഭീകരതയുടെ - 

നീരാളിക്കൈകള്‍ അറുത്തു മാറ്റിയ  

ഒരു മഹാത്മാവിന്റെ അതേ പാതയില്‍ 

അതേ ഭൂമിയിലല്ലേ അവരും നിരാഹരിക്കുന്നത്-  
നിനക്കു വേണ്ടി!!

'ഗാന്ധിയര്‍ 'എന്നു പേരുള്ളവരും,  

ആ പേര്‍ സ്വയം നേടിയെടുത്തവരും 

രാഷ്ട്ര മേലാളന്മാരായിട്ടും നിന്റെ  

സ്വാതന്ത്ര്യത്തിനു വേണ്ടി പട്ടിണി 

കിടക്കുകയാണ് അവര്‍ . 

ഒരു പതിട്ടാണ്ടോളം നിനക്ക് വേണ്ടി  
പട്ടിണി കിടന്നു പോരാടിയിട്ടും 

പതിനൊന്നു വയസ്സുള്ള നിന്റെ 

പിഞ്ചിളം തലയോട്ടിയില്‍ ഭരണ- 

കൂട ഭീകരതയുടെ വെടിയുണ്ട തുളഞ്ഞു- കയറി  
കൊടും ക്രൂരത-അവരേയും നിന്റെ സമുദായത്തെയും നോക്കി-  
പല്ലിളിക്കുകയാണ്..!!

മഹാഗുരു പഠിപ്പിച്ച സഹനത്തിന്റെ പാതയില്‍ 

ഇനിയും എത്ര ദൂരം ദണ്ടി യാത്ര നടത്തിയാലാണ് ,  
ഏത് സമുദ്രത്തിലെ വെള്ളം വറ്റിച്ച് ഉപ്പുണ്ടാക്കിയാലാണ്,

നിനക്കു ശേഷമുള്ളവര്‍ക്കെങ്കിലും സ്വന്തം തലയോട്ടി  

കാക്കാനവുക ?
നിനക്കു വേണ്ടി വേദനിക്കുന്ന കോടി ഹൃദയങ്ങളുടെ  

പ്രതീകമാണ് അവര്‍ -ഇറോം ശര്‍മിള.

ആശുപത്രിയും തടവറയും സബര്‍മതിയാണ് അവര്‍ക്ക്.

അബ്ദുല്‍ ജലീല്‍ കെ